Schrieven

Ik hebbe eindelik es weer wat tied om rustig schrieven te kunnen. Aanders kuj’ toch niks. Et is butendeure iene vieze, natte proeze. Wat hewwe de laeste tied een aekelik rotweer. Ik hebbe eregister een kollum schreven naor anleiding van et lezen van et autobiografische boek Niet normaal, zo normaal van Henk Kluitenberg uut Ni’jberkoop. Doe hi’j geboren wodde, zeden de dokters tegen zien oolden dat hi’j hooguut 4 jaor wodden kon vanwege de spierziekte SMA. Dit jaor raekte Henk weg vlak veurdat zien boek uutkommen zol. Hi’j is 52 jaor wodden. Meer vertel ik niet over dit slim biezundere  boek, daor is die kollum veur. Vandaege he’k een verhael veur et Stellingwarver tiedschrift De Ovend schreven mit de titel Blesdieke, veerder vot as Barcelona. An de haand van foto’s uut mien archief  schrief ik verhaelen veur De Ovend. Et is een verhael van 1050 woorden wodden, mar ik zal et vanzels nog verschillende keren naokieken, dat d’r zullen grif dinkies uuthaeld en an toevoegd wodden.