Johan Veenstra
Stellingwarver schriever en verteller

Schrieven

Plaetst op 26 meert 2023.

Omda’k de laeste daegen alles nog ofzegd hadde en dus daegenlaank liekem allienig thuus was, he’k mar een protte schreven. Ie moe’n toch wat… Twie kollums en twie verhaelen. Iene kollum over de dassen die oonze hiele infrastruktuur wel platleggen kunnen as ze willen. Ik vien zoks wel mooi. De meens die daenkt dat hi’j schepper en schriever is… En een kollum over et feit dat ik gien bad hebbe en sportverslaggever Jack van Gelder wel. De beide verhaelen bin veur et Stellingwarfs tiedschrift De Ovend. Mit ingang van et volgende nommer, april 2023, schrief ik daor verhaelen veur naor anleiding van foto’s uut mien archief. Ik hadde al vufe schreven en now d’r dus nog twieje bi’j. Et eerste verhael da’k now schreven hebbe hiet Eli of Elli, een maegien uut Wenen. Nao de Eerste Wereldoorlog kwam Eli vanuut Wenen naor Ni’jhooltpae en wodde daor et vrundinnegien van mien moeder. En et twiede verhael hiet Een dief en een held. Et gaot over twie manluden uut mien femilie: Wijbe Gerrits Oosterhof en Gerrit Hagevoort. De iene was een dief, de aander een held. En genetisch warkt et allemaole in mi’j deur. Nao al die jaoren nog… Een soortement Verborgen verleden, dat mooie tillevisiepergramme.

Eindelik hewwe de zoemertied weer te pakken, daor bin ik bliede van. Wat is et now vanaovend al lange lochtig. Heerlik vien ik dat!