Schreeuw onder water

Gisteraovend is de jaorlikse sutelaktie uut aende zet in de dörpen Hooltpae en Ni’jhooltpae. Ik hebbe gister nog niet mitdaon, maendag doe ik wel weer mit. Ze weren gisteraovend mit drie ploegies bi’j de weg, dat was bitter weinig. D’r is een groot gebrek an sutelders. As d’r in de sutelaktie niet flink verkocht wodt, is d’r gien geld om ni’je boeken uut te geven. Zo simpel is et. Help de Schrieversronte en et Stellingwarfs en doe es een (peer) keer mit as sutelder! Jim meugen jim ok bi’j mi’j opgeven, dan geef ik et wel deur.

Ik hebbe de Deense literaire thriller Schreeuw onder water van Obro en Tornbjerg lezen. Dat schrieversduo is et echtpeer Jeanette Obro Gerlow (1969) en Ole Tornbjerg (1967). Et is een prachtig en spannend boek. Een vrouwludedokter wodt in de tuun van zien villa mit een mes van kaant maekt. Hi’j ligt dood in de sni’j. Wie het dat daon? Is et een Tsjetsjeense vlochteling die zien vrouw wegraekt is doe ze een poppien kreeg? De vermoordde dokter was verantwoordelik in de opperaosiekaemer. En dan hoolt de dokter d’r stiekem ok nog een vrundinne op nao. Zoks is altied mooi! En zien vrouw dan? Hoe zit et daor mit? Pelisieman Jens Høgh en psychologe Katrine Wraa, die mekeer eins best hiel aorig vienen, moe’n zien dat ze de moordener te pakken zien te kriegen en netuurlik lokt dat!