Schrappen

Ik hebbe een liesien maekt mit marken, daor ik altied hennegong om boeken te verkopen, mit de betreffende kontaktpersonen d’r bi’j en dat naor de Schrieversronte maild. Ze zullen aandere meensken vraogen om dit in et vervolg in plak van mi’j doen te gaon. Dat moet vanzels wel. De Stellingwarver schrieveri’je moet zichter wezen. Op Eupen Stal stao ik in et vervolg dan nog mar ien keer in de weke. Ik hebbe de gemiente West-Stellingwarf weten laoten da’k niet meer verhaelen vertellen gao veur ni’je inwoners. Ik dee dat twie keer in et jaor en al vanof 2005. Nao 20 jaor moet iene aanders dat mar es doen. Ik hebbe nog een stok of drie verhaelen liggen veur et Stellingwarver tiedschrift De Ovend, dan hool ik daor (veurlopig) ok mit op om veur te schrieven. Hoonstrouw dee ik dat de jaoren deur altied, mar dat plichtmaotige moet overboord! De meensken die wat jonger binnen, kun et best overnemen. Gien meens is onmisber.

Nobilis, et Centrum veur prentkeunst op ‘e Fochtel geft now ok een eigen tiedschrift uut. Veurlopig ien keer in et jaor. Et hiet Grafiek hier en et eerste nommer is krek uutkommen. Ik hebbe et mit groot genoegen lezen. Et zicht d’r prachtig uut. Prachtige verhaelen over prentkeunst en keunsteners, al lieke mooie illestraosies en et fermaot vien ik ok arg mooi. Mar dat is vormgever Sijtze Veldema allegeer wel toevertrouwd. De eindredakteur is vanzels Pieter Jonker. De Vrunden van Nobilis kriegen dit moois ommenocht toestuurd. D’r bin op dit mement 596 Vrunden. Et is dus nog mar een haenetree naor de 600!