Schoorlse Dunen

We hebben vandaege niet veerd, mar een fietstocht van 67 kilemeter maekt. Dat was een beste tippe. We zollen aenlik eerst naor Holten om te fietsen, mar we zaggen dat d’r vanuut Zeelaand buien naor et noordoosten trekken zollen. En an de kust zollen gien buien kommen. Now, die kwammen d’r ok niet. We hebben de fietsen om half tiene aachter op ‘e auto zet en bin naor Groet reden. Daor hebben Jelle en ik van 14 t/m 18 september 2020, in coronatied, een midweke in een vekaansiehusien zeten. Daor vlakbi’j hewwe de auto op een parkeerterrein zet en van daor biwwe begonnen te fietsen. Eerst naor Schoorl en doe deur de prachtige Schoorlse Dunen. Et was overal drok mit fietsers. In Bargen an Zee hewwe in een straandpaviljoen wat drinken en een hiempe appelgebak mit slagroom had. En vervolgens bin we over Egmond an Zee, Egmond, Egmond an de Hoef en Egmond Binnen hielemaole naor Castricum fietst. Wat een prachtige tocht! Daor biwwe an et pad weeromme naor Groet begonnen.We hebben eten had in straandpaviljoen Struin in Caamperduun. Dat ligt daor prachtig in de dunen. Ze hebben daor een eigen parkeerterrein en daor moej’ ok veur betaelen aj’ daor eten. Zoks heurt niet! En as et eten now hiel arg geweldig was, mar we hebben et wel es lekkerder had. Bi’j de Koepelbos is de petat aorig beter. Mar et was een prachtige dag. Volop zunne en 22 graoden, mar wel een stevige wiend. Hieronder twie foto’s die ‘k onderweg maekt hebbe. Boven: de vuurtoren van Egmond an Zee. Onder: et karkien van Groet.