Schip mit zwatte zeilen

Ik bin vandemorgen op ‘e fiets naor Wolvege west veur fysiosport. Daornao he’k een boek inleverd bi’j de biebeltheek en een besteld boek mitneumen. Doe ‘k weer thuus was he’k me gauw wat offlodderd en ik bin in de auto stapt. Even veur twaelf ure wa’k bi’j Jarmo en ik bin bi’j him in de auto stapt. In zien middagschoft hewwe naor sjefeurskefé De Stoof west. Hi’j hadde vleden weke in zien vekaansie vanuut Spanje d’r twie keer veur zorgd dat mien tillefoon et weer dee. Ik verwaachtte een peperdure rekening, mar hi’j wol wel trakteerd wodden op een etentien. Eerst docht ik nog an Jan Smink, mar hi’j was tevreden mit een uutsmieter. Dat is nog wel te betaelen. Ik hebbe op et terras van De Stoof een peer plakkies bolle mit een gehakballe had. En doe is hi’j weer an et wark gaon en ikke naor huus toe. Ik bin de hiele middag veerder in huus bleven. Et wodde hier mar liefst 36 graoden.

Hieronder een foto die ‘k een schoffien leden bi’j Eernewoolde maekte doe de zunne d’r niet bi’j was. Ik schreef gister da’k brune zeilen mooi vien en dit schip hadde brune zeilen, mar omdat de zunne d’r niet bi’j was leken et wel zwatte zeilen. Ik mos drekt an Theseus daenken. Iederiene vligt op et ogenblik naor de film The Odessey en over de hiele wereld bin in de boekhaandels de boeken over Odysseus niet an te slepen.  Et verhael over Odysseus nao de Trojaanse Oorlog is vanzels ok prachtig. Mar et verhael over Theseus, ok uut de Griekse mythologie, is lieke prachtig. In et kot… Theseus gong naor et Doolhof van Kreta om daor de Minotaurus dood te maeken. Een vreselik wezen, half meenske, half bolle. Dat lokte him mit hulpe van Ariadne. De beroemde draod van Ariadne… Hi’j hadde zien vader, keuning Aigeus van Athene, beloofd dat as hi’j et moonster doodmaekt hadde mit witte zeilen weerommeveren zol naor huus toe. Et schip zol zwatte zeilen hebben as hi’jzels dood was. Mar Theseus vergat om de witte zeilen hijsen te laoten en veerde mit zwatte zeilen naor huus. Zien vader ston op ‘e rotsen te kieken as hi’j d’r haost ankwam. En doe zag hi’j zien schip mit zwatte zeilen. Zien zeune was dus dood. Van poere ellende sprong hi’j in et waeter en verdronk. Theseus wodde keuning van Athene en de zee waor zien vader in verdronk hiet now de Egeische Zee. Mit een betien fantesie kuj’ je indaenken dat keuning Aigeus zoe’n soort schip ankommen zag. En dan wat groter…