Schaopedief

Vandemorgen he’k op ‘e fiets naor Marian in Wolvege west veur fysio-massage en vandemiddag op ‘e fiets naor fysiosport. Dat ha’k vleden weke vri’jdag deur die vreselike hitte oversleugen. Ik gao d’r zodoende vandeweke twie keer henne. Ik bin bliede dat de slimste hitte veurbi’j is, mar de waarmte zit me nog in de huud. Ik bin d’r wat loom van wodden. En now hebben ze et al over de volgende hittegolf die oons ankem weke lichtkaans over et mad kommen zal. Ik zie d’r now al tegenop. Mar misschien vaalt et toe. We zullen morgen vermoedelik mit de boot et waeter op. Daor is et now wel lekker weer veur.

En dan nog even over gister in Harlingen. Jacob Haagsma het een mooi stok schreven over de prissentaosie van de verhaelebundel Yeeha!. Et ston vandaege in de Liwwadder Kraante. Hieronder nog twie foto’s. Boven: ik hebbe een foto van de Ni’je Willemskade in Harlingen maekt. Et was daor mooi an et waeter. Onder: zonder da’k et in de gaten hadde het mien Sneker literaire maot Henk van der Veer me op petret zet. Ien ding is overdudelik. Ik lope d’r bi’j as een schaopedief en moet neudig naor de kapper. Dat is vleden weke ok overgaon vanwege de hitte.