Schaetsmuseum

Op disse dadde dag van et jaor biwwe d’r lekker even tussenuut west. We bin naor et prachtige stattien Hindeloopen west. Daor hewwe eerst op ‘e zeediek naor et wat woeste waeter van et Iesselmeer keken, doe hewwe een stadskuier maekt en bin terechtekommen in et Schaetsmuseum. Daor wawwe veur de corona ok wel es west, mar daor kuj’ zo now en dan wel es hennegaon. Et is zo mooi! Ze hadden de winkel daor hielemaole veraanderd. We hebben eerst in et resteraant waarme poeiermelk mit wat lekkers had. Ik hebbe een beste hiempe Molkwarder koeke had. En doe hewwe et museum bekeken. Wat een verschillende soorten redens liggen daor! We hebben naor een film over de laeste Elfstedetocht van 1997 keken. Dat blift schitterend om te zien. Zol d’r ooit nog es een zestiende Elfstedetocht kommen? Ik zol et graeg nog mitmaeken, mar ik achte de kaans niet groot. Ik hebbe trouwens beste rieders in de femilie en die kuj’ daor ok tegenkommen. Mien aachternichte Grietje Lukkes-Oosterhof en Gooitske Oosterhof-de Jong, de vrouw van een aachterneve. Grietje wun indertied nog van Atje Keulen-Deelstra doe die nog op ‘e kotte baene ree. Grietje het drie keer Nederlaans kampioene west. Doe we naor de foto’s van Grietje stonnen te kieken, zat d’r ok een vrouw in een rolstoel te kieken. Zi’j hadde eertieds nog tegen Grietje reden! De redens daor Willem-Alexander de Elfstedetocht van 1986 op reden het liggen d’r ok. En ie kun zien stempelkaorte op naeme van W.A. van Buren ok zien. De redenties daor Wilhelmina as jong maegien op ree, liggen d’r trouwens ok. Hiel mooi allemaole. We kommen d’r grif nog wel es weer. Doe we et museum uutkwammen regende et as de zee. Wat hewwe toch altied een verschrikkelik mal weer. We weren van doel om in Staveren wat te eten, mar daor was alles dichte. Dat doe biwwe op ‘e Lemmer belaand in resteraant Centraal an et waeter. Hieronder nog een foto die ‘k vandemiddag, veurdat et begon te regenen, in Hindeloopen maekt hebbe.