San Fernando

Ik hebbe een 28ste wat langer verhael naor Jelle en Geertje stuurd om d’r heur oordiel over te geven. Ze hebben me de tiedinge daon dat et prima in een volgend boek mit verhaelen passen zol. Pieter en Peter hebben et verhael ok lezen en zi’j vunnen et ok een mooi verhael. Et verhael hiet San Fernando en et telt 1912 woorden. Dat betekent dat et op ien nao et kotste verhael uut de riegel van 28 is. Ik kwam op et idee deur de prachtige kleurehooltsnede van Tom Thijsse die op et ogenblik op ‘e Eupen Stal in et gebouw van de Stellingwarver Schrieversronte te zien is. De titel van die prente is Last train to San Fernando. Et wark van Thijsse lat ruumte an alle fantesie diej’ in veurraod hebben. Et verhael gaot over een vrouw van 58 die mit een toyboy van 28 mit de laeste trein naor San Fernando wil. Mar zol dat deurgaon?

Ik hebbe vandaege eerst een fietstochien van 24 kilemeter maekt veurda’k mien plakkien op ‘e Eupen Stal inneumen hebbe. Ik bin bi’j de Kuunder langes naor de sluus bi’j Ni’jberkoop gaon en doe via Bekhof naor de snackbar bi’j de Koepelbos. Daor he’k een brotien kroket en een frikandelle behaffeld. Et eten klaormaeken staot een maond laank op een slim leeg pittien. D’r kwam vandemiddag mar weinig volk. Alleman daenkt dat et ankem weke slimme drok wodden zal as de tempereturen wat dregeliker binnen. We zullen et zien. Ik zal me daor alvast geestelik op veurbereiden.