Rustige boottocht

Gister schreef ik da’k et geweldig vun dat de Belgen mit 4-1 van Amerike wunnen hebben mit voetballen. Aachterneve Feike, die in Belgie woont, stuurde me een prachtig plaetien toe. Manneken Pis in et voetbalshirt van de Rooie Duvels pist Trump op ‘e kop. Ik bin te dom om dat plaetien hier zien te laoten. Mar die malle wiendhapper verdient et om ondermegen te wodden.

We hebben vandaege een rustige en ontspannen boottocht maekt. Ik moet even wat ontspannen dingen doen en veurlopig niks moeten. Vermoedelik deur stress he’k (weer) zoe’n spierpiene. We moe’n zien da’k dat weer kwietraeke. Sommige dingen die in mien agenda staon doe ‘k now even niet. We hebben vandaege van twaelf tot zes ure veerd. Aanders beginnen we altied om tien ure. We hebben ok niet op een terras west om wat te eten zoas aanders. We hadden pakkies fris, een kanne hiet waeter, theepoedegies, bolties en snelle Jelle’s bi’j oons. Dat was ok hiel genoeglik. We bin ok niet veer vot west. Deur Wartena naor Eernewoolde. Daor hewwe wat ommeveerd en doe biwwe via de Fonejachtbrogge weerommeveerd. Et was spietig dat de zunne pas om vier ure uut et nust kwam, mar et was heerlik weer. Et wodde vandemiddag 23 graoden. Eerst ston d’r hielemaole gien wiend, laeter een klein betien. Hieronder twie foto’s die ‘k in Wartena maekt hebbe. Een betien donker omdat de zunne d’r doe nog niet bi’j was.