Rotonde

We hebben gister een hiele genoeglike aovend had in resteraant Boszicht in Ni’jberkoop en et eten was heerlik. Mar dat biwwe wend in Ni’jberkoop. Ie kun d’r allemachtig lekker eten. Ik hebbe een koppien eerpelsoep had, zalmfilet en crème brûlée. Ankem jaor eten we weer bi’j Douwe en Pieter in de buurt!

Vandemorgen he’k in de motregen en de koolde mien eigen fiets weer uut Wolvege weghaeld. Now is dat ok weer klaor. Vandemiddag bin ‘k mit Fettje op vesite west bi’j Jelle en Gerda in Sneek. Dat zol al lange es en dat was ok uterst genoeglik. Ze bin daor mit de weg an de gang west en d’r is now een extra rotonde kommen, daor we over mossen doe we weer naor huus zollen. Ze hebben oons uutlegd hoe we rieden mossen. Doe we op die rotonde weren, snapten we d’r allebeide niks van. We hebben him eerst mar es in de ronte reden. Mar ja, dat kuj’ niet almar doen blieven, ie moe’n een keer van zoe’n aekelik ding of zien te kommen veurdat de bezine opraekt. En doe zatten Fettje en ik dus even laeter in Bolsward. Et is oons dus niet goed genoeg uutlegd, want Fettje en ik bin allebeide van neture slimme schraander. De weg tussen De Jouwer en Sneek bin ze ok weer mit an de gang. De weg is now slim smal en dat was aekelik rieden in donker. Mar we bin toch weer thuus kommen.