Roezige dag

Et was een roezige dag. Vandemorgen he’k mien verjaordag nog een keer vierd nao ofloop van Fysiosport. We hebben gezellig een schoffien bi’j mekeer zeten en ik hebbe op lekkere hiempen oranjekoeke trakteerd. We hadden d’r koffie en thee bi’j. Tot mien grote verrassing wodde ik doe toespreuken deur ien van de vrouwluden. Die fielseteerde me uut naeme van iederiene en ik kreeg een hiele grote verjaordagskaorte daor iederiene wat opschreven hadde. Mooi is dat! Doe ‘k thuus was wa’k et mobieltien weer es een keer kwiet. Ik kon et nargens vienen. Gelokkig he’k ok nog een vaast nommer, dat ik belle mezels dan mar op zokke mementen. Op ‘e overloop gong de tillefoon over. Et is me wat… Ik was om half twieje al weer in Et Vene veur de kontrole bi’j de heurapperaoteman. Ze hebben de boel naokeken. Ik bin hiel arg doof, mar et is de laeste twie jaor niet nog slimmer wodden. Dat is toch ok wel weer mooi. En now maek ik me een lekkere tosti klaor. Ik hebbe veur mien verjaordag een tostiapperaot kregen en daor maek ik mit alle genoegen gebruuk van!