Roezige dag

Et is een drokke en roezige dag. Vandemorgen he’k eerst mien jaordagskedogien ophaeld bi’j de Welkoop, ik hebbe boeken inleverd bi’j de biebeltheek en ik bin naor Marian toe west veur fysio. Vandemiddag he’k bi’j de Schrieversronte trakteerd op gebak in verbaand mit mien verjaordag en ik bin mit Fettje in etzelde gebouw naor de netaoris west. Wi’j praotten Stelllingwarfs en de netaoris Aachterhoeks. Zoks is mooi. Ik wor zo staorigan oolder en bin mar allienig. Een protte dingen weren al goed regeld. Ik hebbe een testement, sund 1996 he’k zodoende al drie executeurs-testementair, en d’r is een stichtingsakte van de JVS. Mar ik hadde nog gien levenstestement en dat zal now ok in odder maekt wodden. As ik tiedelik of veurgoed dingen zels niet meer doen kan, moe’n d’r meensken wezen die dat veur mi’j doen kunnen en veur alderhaande dingen zorgen kunnen. In mien geval de executeurs-testementair. Et is vervelend om mit zokke dingen doende wezen te moeten, mar et geft ok een goed gevuul as et aanst goed regeld is. Vanaovend za’k nog naor een literaire aovend, mar daor vertel ik morgen wel over in dit dagboek.