Roezig

Et is vandaege een slim roezige dag. Vandemorgen om goed acht ure kwam tuunman Arnoud om de boel om huus henne te beredden. Om negen ure kwam Anke om de boel in huus te beredden. En om half viere vandemiddag kwam de monteur van Energie Frieslaand veur de onderhooldsbeurt van de cv-ketel. Ik zitte trouwens mit de buxusmot te holen en te keren, dat smerige ding vret me de buxusbollen kael. Een jaormennig leden hadden ze d’r in et hiele laand last van, mar doe was d’r bi’j mi’j niks te redden. Et is hier now overal in de buurt raek, neffens Arnoud. Indertied was d’r niks an te doen en gong de boel dood. Mar now is d’r wel wat an te doen en het hi’j ze bespuit zodat die motteboel doodgaot. De cv-ketel het zien langste tied had. Ik bin ankem jaor an een ni’je ketel toe. Dat is mooi, dan ontloop ik die waeterpompe-toestaand. Een cv-ketel kan 15 jaor mit. Mit die ni’jen iene zit ik mien tied hier veerder wel uut. Om vuuf ure kommen Pieter en Fettje hier om mi’j op te haelen. We gaon mit een etentien in bistro Jikke in Sneek de 75ste verjaordag van Jelle vieren. Die verjaordag was al meer as een jaor leden, mar corona het alles in de hobbel jacht. Et wodt grif een mooie aovend. Mit plezierige meensken wodt et altied gezellig!