Roezebroekerig weer

Doe ‘k vandemiddag in de auto naor Berkoop ree, miggelde et wat en et was roezebroekerig weer. Ik hadde d’r niet vule fedusie in, want de berichten veurspelden niet zok mooi weer. Mar et vul nog honderd persent mit. De zunne kwam d’r bi’j, et was hielemaole niet koold en de wiend bekwam. Et was wel minder drok as gister, mar d’r kwam toch beheurlik wat volk. Een protte meensken vraogen wat veur gebouw et onderkommen van de Schrieversronte vroeger west het. En dan vertel ik van de Veurschotbaank die veraanderde in Baank Bercoop, die veraanderde in de Frieslaand Baank, die veraanderde in de Rabobaank… De meensken vienen et mooi a’k ze de kluus zien laote. Et is vanzels spietig dat d’r gien flutten geld en goold en zulver in zitten. Ik vule me bi’jtieden krek die tillevisieman die op Schiphol mit alderhaande volk praot. Ik kriege ok de wonderlikste verhaelen te heuren. Vandemiddag pakte een man me bi’j de schoolder en zee dat hi’j mit zien basterdzeune op stap was. Et kan wezen dat hi’j een peer glaezen wien te vule op hadde… Ik hebbe vandemiddag ok weer hiel goed verkocht. Nao mien ziekenhuus-oponthoold he’k now in percies een weke veur 1.150 euro verkocht. Dat is een hiele protte! Nog twie daegen te gaon. Ik zal et zuver missen as de Eupen Stal weer veurbi’j is.