Roetkefé

Ik was vandemiddag in et Drentse Linde veur et jaorlikse Roetkefé. Dat is een bi’jienkomst van schrievers die schrieven in et Drents letterkundig tiedschrift Roet. Et wodde hullen in de Theaterschure an de Linderweg en et was een mooie middag mit tal van (oolde) kunde. Een hiele riegel schrievers (m/v) uut et hiele Nedersaksische taelgebied leesde veur uut eigen wark. De meziek wodde verzorgd deur Janine Kiers en Alvaro Rovero Ruiz. Ik hebbe et verhael Waeterpreens uut mien bundel Naozoemerlaand veurlezen. Ik was haost an et aende van et verhael en doe begaf mien stemme et. Dat heb ik soms. Wat slokkies waeter brengen dan uutkomst. Et was aorig dat Gerrit Klaassen d’r ok was. Mit Haarm en Gé bin ‘k een peer jaor leden nog bi’j him op vesite west in Twente. Hi’j kwam in de auto mit Martin ter Denge die ok een verhael veurlas. Nao ofloop hewwe genoeglik mit een klein koppeltien volk nog een schoffien naopraot, dat et was al donker doe ‘k zokrek thuuskwam. Et was verschrikkelik mal weer onderwegens. Hieronder een foto die ‘k vandemiddag maekt hebbe. In disse vroegere boerderi’je zit de Theaterschure op ‘e dele.