Johan Veenstra
Stellingwarver schriever en verteller
Plaetst op 6 december 2023.
Komt de tied, dan komt de plaoge, zeggen de Twenten. Oolderdom komt mit gebreken. Ik moet in feberwaori veur staar naor et ziekenhuus. Butendat moe’k de kommende vri’jdag ok een betien mit spoed naor de ogedokter in et ziekenhuus. Omda’k dan niet autorieden mag, zal Harry uut Noordwoolde mit me mit.
De laeste weke he’k de Noorse thriller Rode sneeuw van Jorn Lier Horst lezen. D’r hangt een dichte mist boven et Noorse kustlaandschop. De loeken van de vekaansiehuzen bin dichte. Ove Bakkerud is van plan nog een rustig weekaende in zien vekaansiehuus deur te brengen veurdat de boel ofsleuten wodt veur de winter. As hi’j in zien huus komt bliekt alles overhoop haeld te wezen en inbrekers hebben de boel vernield. In et huus naost zienend ligt een dooie, mishaandelde man. Inspekteur William Wisting moet zien dat hi’j ien en aander oplossen kan. Een mooi boek! Dit is et eerste boek uut et Wisting Kwartet. Et smaekt naor meer. Vule meer!