Rippeteren, kuieren en schrieven

Et is vandaege 29 jaor leden dat mien moeder veur de laeste keer jaorig was. Ze zol doe nog percies een half jaor leven. Wat is dat toch al weer verschrikkelik lange leden.

Ik hebbe vandemorgen de meerste verhaelen rippeteerd die ‘k de kommende woensdagaovend vertellen zal in et Karkien van Blesdieke. Morgen doe ‘k de rest. Omdat et zunnig weer was he’k vandemiddag nao et eten een kleine kuier maekt. Daornao he’k weer mit et gedicht an de gang west. Weer zinnen votstrepen en ni’je zinnen bedaenken. Ik vule dat et nog niet goed genoeg is, daor gao ‘k morgen ok wieder mit. Ik hebbe ok een verhael veur et Stellingwarver tiedschrift De Ovend ofmaekt. Dat was halverwege liggen bleven omdat aander wark eerst mos. Mar now is et klaor.

Hieronder nog een foto die ‘k gister in Zwolle maekt hebbe. Et was doe niet zok mooi zunnig weer as vandaege. D’r hong een hiel klein betien dieze in de stad. A’k et geleuven mag wodt et hier in et volgende weekaende wel veertien graoden. Boven nul wel te verstaon. As dat toch es waor wezen moch!