Johan Veenstra
Stellingwarver schriever en verteller
Plaetst op 31 jannewaori 2025.
Ik haele morgens altied in mien badjasse de kraante uut de busse bi’j de weg weg. Doe ‘k dat vandemorgen dee, heurde ‘k et geklop van een specht in de bos naost huus en even laeter kwammen d’r gakkende gaanzen overvliegen. Wat een prachtige geluden. Wat bin ik bliede da’k hier wone!
Ik bin vandaege begonnen mit et rippeteren van de verhaelen die ‘k vertellen zal tiedens mien twie kommende optredens. Vanaovend vertel ik mit aanderen in Museum ’t Kiekhuus in Wolvege en maendagmiddag vertel ik veur de oolderensoos in Opaende bi’j Drachten. Ik zal d’r veur zorgen da’k overal zonder haeperen vertellen kan. Veerder za’k dit weekaende et wat langere verhael Silverboy perberen of te maeken. Dit moet allemaole lokken as d’r gien onveurzienbere dingen gebeuren.