Rippeteren en schrieven

Ik hebbe vandemorgen naor de Stellingwarver Schrieversronte in Berkoop west om de boeken weeromme te brengen die op ‘e kast- en wintermarken, daor a’k henne west hebbe, niet verkocht binnen. Ik hebbe van ’t jaor flink verkocht op die marken. Vandaege he ‘k ok alle verhaelen en gedichten rippeteerd die ‘k morgen veur een klein gezelschop vertellen zal in Hof van Schoterlaand in Mildam. Ik hope dat et d’r now weer goed inzit en da’k me niet verzinnen zal. Ik hebbe vraogd a’k d’r eventueel bi’j zitten mag te vertellen in verbaand mit de zere heupe, mar ik zal et eerst staonde perberen, zoa’k dat altied wend west hebbe. Butendat he’k ok nog twie kollums in klad schreven, die ‘k vandeweke nog veerder uutwarken, verbeteren en veraanderen zal.