Rinny Siemonsma

In de loop van et jaor komt d’r een tentoonstelling over leven en wark van de Stellingwarver schilder Rinny Siemonsma (1940-1985) in kesteel Olt Stoutenburght in Blesdieke. Et wodt orgeniseerd deur de Stichting Bekiek et Mar en kesteelheer Gregorius Halman die een goeie kammeraod van Siemonsma was. In de Stellingwarf ston een oproep as meensken die wark van Rinny in huus hebben dat wel melden wollen. Dat he’k drekt daon, want ik hebbe drie schilderi’jen van Rinny in huus hangen. Dat Karst Berkenbosch het d’r gistermiddag west om ze alle drieje op petret te zetten. Et eerste is een schilderi’je van een huus in Italië. Daor gong Rinny vaeke henne te schilderen. Ik hebbe dat indertied kocht in et hoolten karkien daor Rinny woond en warkt het. In Steggerde, pal tegen De Eese an. Op et twiede schilderi’je staot een prachtige schofferd die krek een prooi sleugen het. Dat he’k arfd van de moeder van breur Jan. Et dadde is een ofbeelding van een klein voegeltien. Dat he’k lange leden kedo kregen van Martin Oostra uut Wolvege. Ik zal zeker naor die tentoonstelling toe gaon!

Ik gao vanaovend naor et Centrum veur Prentkeunst op ‘e Fochtel. Grafikus Peter Lazarov gaot daor vertellen over de laeste jaoren dat hi’j in China warkt en lesgeven het. Ik bin bliede da’k Peter es weer zien kan. Op 26 jannewaori 2018 hewwe tegere op ‘e Fochtel een aovend verzorgd mit zien grafiek en mien verhaelen over de mythologie. Op die aovend weren in hiel Frieslaand van dat soort aovens mit vertellers. We hebben doe neffens mi’j drie keer optreden. Iederkeer kwam d’r een aandere groep volk bi’j oons te luusteren en te kieken. Mit mekeer hewwe doe zoe’n honderd man op vesite had! Dat is werachtig al meer as vier jaor leden!