Rinny Siemonsma (2)

Vandemorgen bin ‘k naor kesteel Olt Stoutenburgh in Blesdieke west en daor he’k een lichte buging maekt veur kesteelheer Gregorius Halman. Dat leek me wel zo fesoenlik… De kommende zaoterdagmiddag wodt in et kesteel de tentoonstelling De iene is de aandere niet eupend. Een tentoonstelling mit dattig schilderi’jen van de Stellingwarver keunstschilder Rinny Siemonsma (1940-1985) die orgeniseerd wodt deur de Stichting Bekiek et Mar. Ien van de schilderi’jen van Rinny die ik hier in huus hangen hebbe, is op die tentoonstelling te zien. Ik hebbe et vandemorgen dus naor Blesdieke brocht en Karst Berkenbosch het et daor drekt ophongen. Hiel mooi! Ik hebbe et schilderi’je mit een roofvoegel d’r op arfd van breur Jan zien moeder. Bi’j Rikie hong et in Wolvege boven de tillevisie, bi’j mi’j in Ni’jhooltpae ok. En now hangt et een weke in een kesteel. De tentoonstelling is t/m 11 september te zien. Dan hael ik die mooie roofvoegel weer op.

Vandemiddag he’k op ‘e fiets naor Wolvege west. Ik hebbe een boek uut de biebeltheek haeld en twie fietstassen vol bosschoppen uut de supermark. Butendat he’k bi’j de apteek twie tebletten haeld, want ik ontdekte vandemorgen een hoolttieke op een bien. Die aekelike dingen he’k in jaoren gien last van had. Vroeger wel vaeke en ik hebbe al es twie keer een malle rooie plakke kregen zoda’k een kure hebben mos. Uut veurzorg he’k now twie tebletties inneumen. Nao alle bosschoppen he’k theedronken bi’j Gooitske en Hieke. Daor wa’k al in tieden niet west, dat wodde dus meer as tied. We hebben genoeglik bi’jpraot. De hond vun et ok mooi da’k even langeskwam!