Rinkelbom

Vandemorgen he’k op vesite west bi’j de Friese zanger/troebadoer Adri de Boer in Lippenhuzen. Adri het drie keer de finale van et Friestaelige lietiesfestival LIET wunnen. Ongeveer dattig jaor leden hewwe tegere al es optreden in et Witte Huus in Donkerbroek. Doe was hi’j nog de zanger van de groep ADRI&SA. Ik bin ok wel es bi’j een optreden van him in et karkien van Schurege west. Zo now en dan kruzen oonze wegen mekeer dus. En dat is now dus weer et geval. We meugen tegere een morgen mit meziek en verhaelen verzorgen in De Rinkelbom in Et Vene op woensdagmorgen 25 meie. In et kader van de reeks Verhalen uit de Samenleving. Daor hewwe et vandemorgen dus over had. We hebben een indieling van veur en nao et schoft maekt. Jim meugen allemaole kommen, dat zollen we allebeide hiel mooi vienen. Laot jim een morgen laank gezellig verwennen deur een zanger en een verteller! Et wodt een mooi meertaelig pergramme: Fries en Stellingwarfs. Hier nog wat gegevens. Et adres van De Rinkelbom is Zwanedrift 2 in Et Vene (Heerenveen). De daotum is dus 25 meie. Et pergramme begint morgens om tien ure. We zingen/speulen/vertellen twie keer drie kertier mit een schoft d’r tussenin. Jim kriegen daor een bakkien koffie of thee. Jim hoeven jim niet van teveuren op te geven, mar kun d’r zo hennegaon. Nao ofloop kuj’m een vri’jwillige bi’jdrege geven. Ik hope pattie dagboeklezers daor te zien!