Rink van der Veldepries

Tussen de bujjen deur he’k vandemiddag nog even Berkoop en De Hoeve ommefietst. Et was heerlik weer. In Berkoop he’k nog wat bosschoppies daon in de winkel. Et kan now nog, de supermark van Berkoop sluut op 12 september de deuren.

Ik kreeg een uutneudiging veur de uutreiking van de Rink van der Veldepries 2026 op vri’jdag 4 september in resteraant It Polderhus op ‘e Veenhoop. Dat is an de aandere kaant van et waeter as Ie-Sicht daor we vaeke op et terras zitten te eten. Ik zal d’r vri’jdag mit Douwe henne. De Rink van der Veldepries is bedoeld veur schrievers die veur een bried pebliek toegaankelik literair proza schrieven in ien van de genres die de Friese schriever Rink van der Velde beoefende, in et Fries of in ien van de streektaelen die in Frieslaand aktief bruukt wodden. De pries wodt vri’jdag uutreikt an Marga Claus veur heur roman Libbe. In coronatied, in 2020, wodde de pries an mi’j toekend veur de roman Vroeger is veurgoed veurbi’j. Mar die kon eerst laeter uutreikt wodden en doe mochten d’r nog mar een peer meensken bi’j wezen. De pries wodt now veur de twaelfde keer uutreikt. Marga Claus is nog mar de twiede vrouw die de pries krigt. De pries is een initiatief van de gemiente Smallingerlaand en de Stifting Frysk Letterkundich Museum en Dokumintaasjesintrum (FLMD) en wodt vanof 2004 toekend. Hier de winners: Koos Tiemersma (2004), Harmen Wind (2006), Auck Peanstra (2008), Arjen Terpstra (2010), Ferdinand de Jong (2012), Ale S. van Zandbergen (2014), Anne Feddema (2016), Willem Schoorstra (2018), Johan Veenstra (2020), Leo Popma (2022), Gerard Marcel de Jong (2024) en Marga Claus (2026).