Rink van der Veldepries

Ik kreeg een uutneudiging angaonde et uutreiken van de Rink van der Veldepries 2022. Leo Popma het de pries wunnen veur zien roman It sket fan Toussaint. De pries wodt zaoterdag uutreikt in resteraant It Polderhûs op ‘e Veenhoop. Ik wun de Rink van der Veldepries 2020 veur mien roman Vroeger is veurgoed veurbi’j. In verbaand mit corona wodde die pries pas vleden jaor in De Lawei in Drachten uutreikt. D’r moch doe mar een klein koppeltien volk bi’j wezen. Ik vun et prachtig da’k een uutneudiging kregen hebbe en wat wa’k d’r graeg hennegaon, mar… et is me allemaole wat te drok. Ik moet et wat kalman doen, zeggen de geleerden en de meensken die et goed mit me mienen. Wat is dat vervelend! Ik wil graeg alles doen en overal henne. Ik hadde me veur de kommende zaoterdag trouwens lange leden al opgeven veur een kulturele busreize naor de Aachterhoek in verbaand mit et Jeanne Bieruma Oostingjaor. Van et Centrum veur Prentkeunst op ‘e Fochtel naor Zutphen en Almen. Dat he’k toch ok mar ofzegd. Een hiele dag tussen een koppel praotende meensken… Ik moet d’r even niet an daenken. Ik wodde gister vraogd a’k ankem weke wel argens vertellen wil in Wolvege. Dat he’k ok ofwimpeld. En… ze wollen graeg een tillevisiepetret van me maeken, mar dan zollen alle opnaemen de kommende peer weken al maekt wodden moeten. Dat moet dan ok mar niet. Ik zal wel slim verstaandige besluten nemen, mar et hangt me de keel uut.