Johan Veenstra
Stellingwarver schriever en verteller

Ried

Plaetst op 17 jannewaori 2022.

Et is een aorighied om zundagsaovens te kieken naor de boottocht van André van Duin en Janny van der Heijden bi’j de Friese elf steden langes. Et aorige is daj’ een protte bekende plakkies zien. Butendat hewwe hiele stokken van heur route ok mit de boot veerd. Dat was drekt in de eerste oflevering al raek. Vleden zoemer veerden wi’j ok over de Zwette van Liwwadden over Scharnegoutum naor Sneek. En gisteraovend was et weer raek. Wi’j veerden de veurige zoemer over Ried naor Franeker. Et botiesvolk van de tillevisie veerde gisteraovend van Franeker naor Ried. Ik herkende van alles onderweg. En Ried kwam me hielemaole bekend veur. Behalven dawwe daor langesveerd binnen, he’k in et verleden ok over et pad bi’j et waeter langeskuierd. Ik hebbe in 2014 en 2015, beide keren op 21 juni, mitdaon an de Midsimmerjûn in Ried. Verschillende vertellers stonnen butendeure op et langst van de daegen op verschillende plakkies te vertellen. En dan kwammen d’r groepies meensken bi’j je langes om naor je te luusteren. Kammeraod Douwe Kootstra ston in een boot te vertellen, ongeveer op et plak daor André en Janny gisteraovend anlegden. As de meensken naor Douwe luusterd hadden, leupen ze et pad veerder daele naor mi’j toe. Dat kwam me al kiekende allemaole weer in de gedaachten. Nog langer leden he’k op een aovend in Ried west te vertellen veur de bejaorden die heur jaorlikse busreisien maekt hadden. Ze wodden deur et meziekkorps inhaeld. Dat gebeurde vroeger in meer Friese dörpen. En daornao moch ik verhaelen veur heur vertellen. Ik hebbe et even naokeken: dat was op 6 juli 1996. Tien daegen laeter zol mien moeder wegraeken. In een protte plakken he’k as schriever/verteller herinnerings liggen. Die van Ried kwammen gisteraovend weer naor boven borrelen…