Ria op vesite

Vandemorgen om elf ure henne kwam aachternichte Ria hier. Zi’j en Elly hadden gisteraovend geneuten van de opera an de Scheene. Wi’j hebben genoeglik bi’jpraot en bin in mien auto naor de Driewegsluus reden. Daor hewwe wat eten in et paviljoen daor et hatstikke drok was. Ria het een tosti Hawai had en ikke een koppien champignonssoep en een plakkien bolle mit een kroket. Oolder woddende meensken eten almar minder. Ik hebbe heur et ni’j anlegde terrein bi’j de Driewegsluus zien laoten. Alle camperplakken weren bezet. Ik hebbe Ria op petret zet bi’j de TOP-zuilen. Op ‘e rechter staot in et blauwe vlak onder mien gedicht Naozoemerlaand. Vier keer vier regels om de vierkaante zuil henne. Zie foto hieronder. In Wolvege het ze bi’j modehuus Boersma nog wat mooie kleren kocht. We bin ok naor de beide Wolvegester bakkers west om oranjegebak zoas dat heurt te wezen. Echt oranje en mit crème d’r op. Ze hadden allienig mar rose-achtig spul mit een kwak slagroom d’r op. Zo taekelt de hiele wereld of. Dat spul is vanzels niet mitgaon in de auto naor huus toe. Bi’j mi’j thuus hewwe nog een peer bakkies drinken had en doe is Ria nog naor een kammeraodske van vroeger in Boornburgum gaon. Ze hoopt vanaovend veur duuster weer thuus in Papendrecht te wezen. Ik hope daor in jannewaori bi’j heur te wezen as et twiede en laeste diel van heur autobiografische boek uutkommen zal.