Renger

Vleden jaor kwam de Nederlaanstaelige roman De baptisten van Nyk de Vries uut. Ik was bi’j de prissentaosie in Boekhaandel Burgum. Et boek wodde uutgeven deur De Arbeiderspers. Een hatstikke mooi boek mit een protte autobiografische elementen. Dat smaekte dus naor meer. Ik hebbe now de Friestaelige versie van Nyk zien roman Renger uut 2016 lezen. Dat boek wodde uutgeven deur de Afûk. Veur disse roman kreeg Nyk de Piter Jelles Priis. D’r is ok een Nederlaanstaelige versie, die is een jaor eerder ok uutgeven deur De Arbeiderspers. Van dit boek he’k ok slim geneuten. Ik hebbe et aenlik in iene goeze uutlezen. Et is ok weer hiel autobiografisch. Et gaot in belangrieke maote over Nyk zien leven, zien jeugd in Noordburgum. Zien heit was een zunige bouwvakker uut de Friese Woolden, zien mem was huusvrouw. Nyk was as jonge jonge zanger bi’j de punkrockfermaosie The Amp. In Grunningen studeerde hi’j geschiedenis en hi’j warkte as vakkevuller bi’j IKEA. Sund 2000 is hi’j schriever. En wie is Renger? Een man die hi’j van vroeger kent, een man in een wit pak, daor hi’j in dit verhael op een gegeven mement bi’j in de auto stapt… Ooit he’k mit Nyk en de Bildtse schriever Hein Jaap Hilarides een mooie aovend verzorgd in De Lawei in Drachten. Daor daenk ik altied nog mit genoegen an weeromme.