Remco Heite

Ik kreeg gisteraovend et vreselike ni’js dat Remco Heite uut de tied raekt was. Hi’j wodde geboren op 8 feberwaori 1946 in Steggerde en raekte op 2 feberwaori 2026 weg in zien huus in Wolvege. Hi’j is dus krek gien 80 jaor wodden. As Stellingwarver wodde hi’j burgemeester van zien eigen gemiente. Dat was hiel biezunder. Hi’j was al wethoolder doe burgemeester Jan Schurer slim ziek wodde. Remco Heite was geliefd bi’j et volk. Hi’j was ok een literetuurkenner en zol, ok as burgemeester, altied opkommen veur et Stellingwarfs. An zoe’n iene hej’ wat! Ik hebbe de jaoren deur een protte mit him te maeken had. As bestuurslid van de Stellingwarver Schrieversronte en Stichting Nobilis, et Centrum veur Prentkeunst op ‘e Fochtel. Remco was daor mar liefst 25 jaor laank veurzitter. Wat heb ik een protte goeie herinnerings an him. Ik wete nog goed dat hi’j veur een koppeltien schrievers in Makkinge in 1981 mien eerste roman Een vlinder van zulver besprak. Mien moeder was d’r die aovend ok bi’j. Wat is dat lange leden… In de tachtiger jaoren zat ik mit him en Tineke Steenmeijer in de jury van de H.J. Bergveldpries. We hebben Hendrik Vondeling doe veurdreugen veur de pries. In 2001 speldde hi’j mi’j as burgemeester een keuninklike onderscheiding op et jassien. Hi’j het him d’r stark veur maekt da’k ridder wodden zol. Aanders was dat niet gebeurd. Doe hi’j ziek wodde en niet langer burgemeester blieven kon, heb ik een verhael hullen in de hal van et gemientehuus. Hi’j wodde doe ereburger van West-Stellingwarf. We bin mit mekaander een aorige en uterst sympathieke Stellingwarver kwietraekt. Ik neme al die mooie herinnerings an him mit op mien veerdere reize deur et wiffe leven. Hieronder nog een mooie foto uut mien archief. Op 29 meert 2021, midden in de coronatied, wodde ik tot mien grote verbaozing benuumd tot ereburger van West-Stellingwarf. Remco was daor die aovend bi’j. De iene ereburger mist de aandere.