Reinigingsvlocht

Ik hebbe vandemiddag drekt weer een fietstochien maekt. Et was al weer heerlik veurjaorsweer. Ik bin bi’j de Kuunder langes naor Berkoop fietst en doe over Noordwoolde en De Hoeve weer naor huus toe. Hieronder een foto van de Noordwooldiger Vaort daor a’k overfietst bin. Dat was mit mekaander 27 kilemeter. Van Klasien kreeg ik gister een mailtien. Ze mailde me dat d’r vroeger ok wel mooie veurjaorsdaegen in feberwaori weren en dat de bi’jen of iemen dan een reinigingsvlocht hullen. Dat is waor. Dat doen ze trouwens ok wel in jannewaori. Et hoeft niet iens slimme waarm te wezen, mar de zunne moet d’r wel volop bi’j wezen. Dan poepen ze heur dus leeg. Dat wus ik vanzels wel, want wi’j hadden vroeger een bi’jestal mit tal van kaasten en körven mit bi’jen. Op een taofeltien in et aachterhuus ston een gimmeleren schaole mit een stok raot d’r in daor de hunning uutleup. Daor koj’ zo een schep van nemen. D’r ston ok een emmertien mit soepe en een slief d’r in. Daor koj’ zo een slok van nemen. Dat d’r ok wel dooie bromvliegen in dreven maekte niks uut. Doe ‘k thuus was he’k een lekkere kruudkoeke bakt. Et recept ston in et laeste nommer van Landleven daor ok een interview mit mi’j in staot. Alles wa’k neudig hadde, ha’k wel in huus: bloem, bakpoeier, zoolt, keneel, koekekruden, brune suker, appelstroop en hunning. In plak van melk he’k soepe bruukt en in plak van neuten he’k rezienen, sukade en vruchtemix bruukt. Een heerlike koeke!