Redbad, de legendarische koning

Naoda’k vandemorgen naor fysiosport west hadde, bin ‘k mit de trein naor Liwwadden gaon. Daor he’k in et Fries Museum eerst een tosti thuus en wat drinken had. En ik trof Geert de Vries daor, die zat daor mit een vrouw daor a’k de naeme now van vergeten bin. Schaandelik… We hebben even praot. Ik kenne Geert nog van Omroep Frieslaand. Vervolgens he’k de prachtige tentoonstelling Redbad, de legendarische koning bekeken. Redbad was om et jaor 700 henne de heidense keuning van Frisia. Dat was de kuststroke van Vlaanderen tot Denemarken an toe. Plus et Utrechtse revierelaand. Redbad mos omstreeks 690 in de Slag bi’j Dorestad (Wiek bi’j Duurstede) zien meerdere erkennen in Pepijn II van Herstal, de Frankische Hofmeier. Die hadde meer macht as de keuning van de Franken. Liekewel trouwde Theusinde, een dochter van Redbad mit Grimoald, de jongste zeune van Pepijn. Laeter versleug Redbad een aandere zeune van Pepijn: Karel Martel. Redbad kreeg doe weer meer macht en rekende of mit de kristelike invloed van missionaris Willibrord. Die maekte dat hi’j hier wegkwam en Redbad leut de kristelike karken vernietigen. Hi’j zol him nooit bekeren laoten, mar bleef zien eigen goden trouw: Wodan en Odin… As heidense keuning kon hi’j zien veuroolden nao zien dood treffen in et Walhalla en niet in de kristelike Hemel. D’r is prachtig spul te zien op ‘e tentoonstelling: zulveren munten, waopentuug, kleraosie, potten en kruken, sieraoden, beelties, grafgiften, et geraemte van een man die ieuwen goed konserveerd in et vene legen hadde. Ze konnen nog naogaon dat hi’j tiedens zien leven vleis en vis eten hadde. D’r was ok een geraemte dat in een uutholde boom/een boot begreuven was. Ie kun him d’r nog in zien liggen. En d’r ston et geraemte van een hond. Hieronder twie foto’s. Dit is op ‘e tentoonstelling te zien. Boven: een petret van keuning Redbad, die misschien wel in Medemblik woond het. Onder: een zulveren beeltien van de god Odin uut Denemarken.