Receensie

In et Friesch Dagblad ston gister een hiele mooie receensie van Jaap Krol over mien laeste verhaelebundel Naozoemerlaand. Een mooie zin uut de bespreking was: De ferhalen hawwe gewicht, mar binne nea gewichtich. Et hadde wel minder kund!

Twie jaor leden he’k veur et laeste suteld en doe bin ‘k d’r op ‘e laeste aovend henneknoffeld. Vleden jaor lag ik bi’j et begin van de sutelaktie in et ziekenhuus mit een daarmofsluting. Doe he’k hielemaole niet suteld. En nao de galblaozeopperaosie van vuuf weken leden wa’k eins van plan en sutel nooit meer. Ik wor ommes oolder… Mar ja, et oolde goed moet eerst of, zee mien moeder altied. Dat ik hebbe gisteraovend weer suteld. Allienig mit een kroje in Hooltpae. Et gong goed, ik hebbe veur 215 euro verkocht. We weren gister mit zes krojen bi’j de diek. Drie meensken sutelden allienig. Dat schilt in de opbrengst. As d’r niet meer sutelders bi’jkommen is dat nog de ienige meugelikhied om beheurlik wat centen bi’j mekeer te scharrelen. Et is te hopen dat meer sutelders zo now en dan es een keer allienig sutelen willen. Et moet niet zoveer kommen dat d’r gien centen meer binnen om ni’je boeken uutgeven te kunnen. D’r is gisteraovend veur 1128 euro verkocht.

En doe kwam d’r vandaege een rouwkaorte die mien agenda veur de rest van de weke beheurlik overhoop haeld het. Ik zal d’r vri’jdag uutgebreid op weerommekommen. Mit et oolder wodden zullen d’r meer en meer malle berichten kommen…