Reakties op kollum

Zowel gister as vandaege kwammen d’r reakties op mien kollum Eke belt… in de Liwwadder Kraante van gister. Veur et Fries komt d’r 18 miljoen euro extra subsidie vanuut Den Haag en de perveensie wil de Stellingwarver Schrieversronte een stok henne votbezunigen en et Fries verplichten op ‘e schoelen in Oost-Stellingwarf. Wat een vieze streek. Daor is dus een BBB-dippeteerde verantwoordelik veur. Meensken die op die perti’j stemd hebben, hebben dus in wezen tegen et Stellingwarfs stemd. Gister kreeg ik mailties van meensken uut Ien in Drenthe, Et Vene en Noordwoolde. Vandaege kwam d’r een tillefoontien van een man uut Oosterwoolde en een mail van een man uut Sneek. Die mailde: de kortzichtige, hautaine politieke mentaliteit van leden van Gedeputeerde Staten van BBB en FNP als het gaat om minderheden. En zo is et percies.

Awwe et toch over minderheden hebben… Gister ston d’r ok een prachtig interview in de kraante mit kienderboekeschriever Dolf Verroen die 95 jaor is en krek nog een boek publiseerd het. Et hiet Een regenboog in mijn kast en gaot over een joongien dat homoseksueel is. Dolf maekt him grote zorgen over de toekomst now de wereld om oons henne zo an et verrechtsen is. Dolf zegt: Mensen zijn van nature geneigd om alles wat anders is te veroordelen. Ik bin et mit him iens en maeke me ok grote zorgen. De minderheden kriegen altied de schuld as et d’r op ankomt. Die bin almar weer de pineut omdat meensken nooit leren van de geschiedenis.

Ik was vandemorgen op vesite bi’j Haarm en Jacob in Et Vene. Ik wol even uuttesten a’k bi’j heur op mien smartphone en laptop op internet kommen kon. En dat lokte dus prima. Ik hebbe goeie hope dat et over drie weken in Lochem ok lokt en da’k van daor dan elke dag een dagboekstokkien schrieven kan. Haarm kreeg een schoffien leden de H.J. Bergveldpries veur zien jaorenlange vrotteri’je veur et Stellingwarfs. Die pries was een mooie penning en een geldbedrag. Veur dat geld het hi’j een prachtig beeld kocht. Et hiet Drie krijgers en is maekt deur Jolien Wesselink uut Den Haag. Ik hebbe d’r een foto van maekt zodat jim now allemaole even bi’j Haarm en Jacob is huus kieken kunnen.