Reakties interview

D’r kommen nog altied berichies angaonde et radio-interview van zundagmiddag: een tillefoontien van een mi’j kompleet onbekende aachtergatsneve uut Sneek, kaorten, mailties. Daank veur al die lieve reakties. Een aachtergatsneve is de zeune van een aachterneve of -nichte. In dit geval aachternichte Geeske uut Steggerde. Ik schreef dat de radiouutzending zels in Aalten beluusterd was. Dat vun ik al hiel wat. Mar now kree’k bericht dat et ok in Oss beluusterd was deur Rink en Jellie en… op ‘e Filipijnen. Dat is nog een tippien veerder vot as Aalten en Oss. Et Stellingwarfs verovert de wereld op disse meniere! Naor anleiding van dat interview kree’k gister in de naomiddag een man uut Drachten an de deure. Hi’j wol graeg mien laeste boek Naozoemerlaand en de autobiografische roman Een brogge van glas. Dat laeste boek is allienig nog mar as luusterboek te koop. Iederiene die dat boek nog hebben wil kan et ongetwiefeld twiedehaans kopen bi’j www.boekwinkeltjes.nl En dan de naeme van et boek en/of de schriever intikken. Dan komt et grif goed.