We bin d’r vandaege lekker op uut west in de vrieskoolde. In Stienwiek hewwe de prachtige Jugendstil of art nouveau villa Rams Woerthe bekeken. Et huus ligt in een park daor hatten lopen. Rams Woerthe wodde in et begin van de veurige ieuw zetten laoten veur 70.000 gulden deur de femilie Tromp Meesters. Dat was de elite van Stienwiek in die tied. Dat bedrag was doedestieds een enorm kaptaol. Et huus is in ien woord schitterend. Prachtige grote kaemers mit mooie meubels en klokken. En d’r is ok een serre mit plaanten. In de tuunkaemer zat een vrouw te bodduren. Ze zee dawwe d’r mar bi’j zitten gaon mossen, dan kregen we elk een koppien thee mit een kniepertien. Veur niks! Wat aorig! We hebben nao ofloop vanzels wel wat geld in een bussien daon. Ie kun daor alles mit een museumkaorte bekieken en ie meugen ok overal op zitten. In de kelders van de villa is et Hildo Krop Museum. Krop wodde in Stienwiek geboren en wodde laeter stadsbeeldhouwer van Amsterdam. Wat het die man een mooie dingen maekt. Behalven beelen ok keramiek en meubels. We hebben eerst twie filmpies over him bekeken. Die man het Amsterdam enorm verriekt. Nao Stienwiek biwwe naor Wolvege gaon. Daor hewwe de Ooldhiedkaemer bekeken en veural de tentoonstelling mit kaststallen van Jan de Vries. Hiel mooi! En dan te bedaenken dat Jan een protte zels maekt het. An et aende van disse mooie dag hewwe elk een bod waarm eten had bi’j Van der Valk in Wolvege. Hieronder een foto van Rams Woerthe die ‘k vandemiddag maekt hebbe.
