Raerd

We bin d’r vandaege lekker op uut west en hebben twie museums in et dörp Raerd bekeken. Die weren tussen de kastdaegen en ni’jjaorsdag los. Eerst hewwe naor et Pake Titus Boeremuseum van Titus de Wolff in Flânsum west. Dat is een buurtschop van een stokmennig grote boerderi’jen an een hiel smal weggien bi’j Raerd. Dat was veur een pat wel een feest van herkenning. Al dat oolde boereark ken ik vanzels wel. Hujharken, een wiezeboom, oolde waegens, krojen, alderhaande vörken, zoas een eerpelvorke die wi’j vroeger ok hadden. En veerder oolde hujmesienen en een hiele verzaemeling oolde trekkers. Wat ok hiel mooi was, weren de keuken en de mooie kaemer van et boerehuus. Kompleet mit een hoolten waand mit bedsteden die nog dezelde kleuren en versierings hadden as twiehonderd jaor leden. Hiel biezunder. We wodden rondleided en ze vertelden oons van alles. Op ‘e grote dele konnen we wat waarm drinken kriegen. Daor vlakbi’j hewwe et Moter Museum Frieslaand bekeken van Gerrit en Greetje Miedema. D’r weren ok meensken uut Hooltpae te kieken, dat ik wodde votdaolik herkend. Dat was ok een mooi museum mit de Grote Kastshow van oolde auto’s, moters en ok nog een peer fietsen. We hebben oons daor ok de ogen uutkeken. We hebben vanaovend lekker waarm eten (schnitzel) had in grandkefé ’t Stadhuys in Wolvege. Dat zit in et mooie, oolde, witte gemientehuus in et centrum. Et is mooi van binnen! Hieronder een foto  die ‘k vandemiddag maekt hebbe in et Moter Museum Frieslaand.