Radio-interview

Op zundagmiddag 13 augustus wodt et interview uutzunnen op Omroep Frieslaand-radio dat René Koster mit me had het in et kader van de reeks Het levensverhaal van… Et is middags van 12 tot 1 ure. Op ‘e site van de Omroep komt een artikel mit foto’s van mi’j. Die foto’s he’k vandemiddag naor René toemaild.

Ik hebbe krek een Stellingwarver om utens over de heerd had. Tjeerd uut Engelum. Hi’j kwam een bestelling ophaelen van mien laeste verhaelebundel Naozoemerlaand en de roman Vroeger is veurgoed veurbi’j. Hi’j was toch in de buurt en dan kuj’ et vanzels beter bi’j mi’j anhaelen as dat ik et opsturen moet. Dat schilt in de kosten. De roman Vroeger is veurgoed veurbi’j, waor a’k de Rink van der Veldepries veur kreeg, is now uutverkocht. Wie et boek nog hebben wil, kan nog terechte bi’j de Bruna in Oosterwoolde. Daor hadden ze vleden weke nog 2 exemplaoren te koop. Misschien dat d’r ok nog een verdwaelden iene te bezetten is bi’j Van der Velde en/of de Afûk in Liwwadden. Mar daor bin ‘k niet wisse van.

Harry stuurde me een foto uut Epen in Limburg daor hi’j op et ogenblik op vekaansie is. Et aorige is dat daor ok de Limburgse naemen op ‘e plaknaembodden staon.