Radio

Van de filmregisseur Alfred Hitchcock is bekend dat hi’j wel es as figuraant in zien eigen films opdeuk. Ik komme niet in mien eigen  film veur. Now ja, de Sultan van Bercoop is vanzels Steven de Jong zien film, mar et vuult ok een betien as mien film. Alhoewel… et liekt d’r now op dat mien stemme d’r wel even in veurkommen zal. Meer as dattig jaor leden vertelde ik donderdags mien stiekelstokkies veur de Friese radio. In de film bin ik ok op ‘e radio te heuren en ik vertelle wat veur weer et wodt. Hiel arg winterweer mit een bratse sni’j dus en een hadde poesterd. Weer om in huus te blieven. Steven mailde me een weerbericht toe. As ik dat even vertaelen wol in mooi en geef Stellingwarfs. En dan mos ik et inspreken op ‘e tillefoon en him et dan appen. Hi’j hadde ok wel een bericht in et Chinees naor me toesturen kund, want ik snapte d’r niks van. Mar niet iederiene is zo dom. Vandemorgen het Sybren, die de heufdrolle speult, even bi’j me west. Ik hebbe de tekst inspreuken en hi’j het et naor Steven appt. En now mar zien. Et kan d’r vanzels ok zo weer uutknipt wodden. Mit film weej’ et nooit. We zien et op 12 november wel.

Anke het vandaege et huus schonemaekt en ik bin vandemiddag naor fysiosport in Wolvege west. Ik zal d’r vri’jdagmorgen ok weer henne.