psu-kaaste

Bi’j et bekieken van de tentoonstelling over de dienstplicht in Nederlaand kwammen d’r gister een protte herinnerings bi’j oons boven. Netuurlik lag d’r een militair paspoort. Dat heb ik ok nog en daor kwammen alle inentings en zo in te staon. D’r lag ok een kettientien mit de twie metaolen herkenningsplaeties die we om de hals hadden. Aj’ sneuvelden kon d’r iene ofbreuken wodden. Dan hul ie dus iene omme en konnen ze zien wie aj’  binnen en d’r wodde iene veur de administraosie mitneumen zodat de naobestaonden bericht kriegen konnen. Zo staot me dat temeensen bi’j. Op die plaeties stonnen je gegevens: naeme, militair nommer en bloedgroep en zo. Mien nommer is 46.01.06.533. In mien paspoort staot dat ik bloedgroep O hebbe, as donor pos., as pesjent neg. En d’r lag vanzels een messtin daor we camouflagenetten (stamppot andievie) in opschept kregen. D’r ston ok een psu-kaaste. (psu betekent persoonlijke standaarduitrusting). Ik hebbe d’r een foto van maekt. Zie hieronder. Bovenin rechts staot een messtin. En veerder is et een rommeltien. Awwe oonze kaaste op disse meniere inpakt hadden, was et niet best. Alle klereboel mos op ‘e centimeter recht liggen. D’r was iederkeer kontrole. Dan kwam d’r zoe’n wetig ofciertien of onderofciertien mit leren haanskies an alleman bi’jlanges. Ze hullen de leren vingers overal over as d’r of stof lag. As dat zo was, was et niet best. En die kaaste mos perfekt inpakt wezen. As et d’r uutzag zoas op disse foto zol et mannegien alles bi’j mekeer raozen en d’r alles uutscheuren en dan koj’ opni’j beginnen mit netties inpakken. As et dan nog niet goed was, kon je dat zomar extra braandpiket opleveren en een weekaende niet naor huus. Dat weren nog es tieden! We hebbe gisteraovend heerlik eten bi’j Van der Valk in Wolvege. We kregen et op een mooi bod en niet in een messtin. We kregen ok gien camouflagenetten!