Proemen en peren

Een peer weken leden ston hier op ‘e buurt een grote bak mit proemen, die daegeliks anvuld wodde, en waor aj’ zat uuthaelen konnen. Zodoende he’k een hiele flut lekkere sjem maekt. Now staot hier op honderd meter van mien huus een grote bak mit stoofperen. Daor kan alleman veur niks ok zat uuthaelen. Ik hadde Geertje en Sieger hier krek even. Ze hadden grote tassen vol boeken bi’j heur en ik moch daor wat uuthaelen. Ik hebbe drie literaire thrillers uutkeuzen: Uitglijder van Loes den Hollander, Het laatste offer van Simone van der Vlugt en Zeezicht van Linda van Rijn. En Sieger en Geertje hebben een flut van die stoofpeerties mit naor Liwwadden neumen, krek as Jan en Diana ok een flut mit naor Aalten neumen hebben. Ik hebbe zels vuuf potten peerties weckt.

Nog even over gister… Jan en Diana nammen me allegeer lekker spul mit vanuut de Aachterhoeke en poes Marja kreeg een groot pak party mix van Felix. Meerdere meensken nemen lekkers veur poes mit as ze hier kommen. Poes is slim gesteld op dat soort vesite. Aanderen meugen hier vanzels ok wel kommen, mar daor het poes dan vanzels niet echt de meerste belangstelling veur. Hieronder nog twie foto’s van gister. Boven: groepsfoto veur de museumbus daor we mit deur Noordwoolde toerd hebben. Onder: Diana maekte disse mooie foto van de karke van Noordwoolde.