Johan Veenstra
Stellingwarver schriever en verteller

Probus

Plaetst op 22 jannewaori 2025.

Ik hebbe van de president van Amerike begrepen dat hi’j van God persoonlik de opdracht kregen het om zien zegenrieke wark hier te doen. Aj’ zoe’n zelsoverschatting hebben is dat niet griezelig meer, dan is et levensgeveerlik. En now kan ‘k de schriever van et evangelie neffens Lukas wel naozeggen van: Vader, ze weten niet wat ze doen. Mar disse poedzak wet bliksemse goed wat hi’j dot.

Vandemiddag moch ik verhaelen vertellen veur de leden van Probus in Parkhotel Tjaarda in Oranjewoold. De vrouwluden mochten ok mitkommen. Dat ik hadde 35 meensken veur me zitten te luusteren. Et gong prima. Ik hebbe gien malle fouten maekt, een inkeld hikkeltien zat d’r wel in. Mar daor hebben de meensken niks van verneumen. Ik zal morgen weer rippeteren veur vri’jdagmiddag. Ab en Tineke weren d’r vandemiddag ok. Douwe en ik hebben as kollumnisten van Omroep Frieslaand in de veurige ieuw al es bi’j heur eten en doe biwwe nao et eten mit mekeer naor de voetbalwedstried Et Vene-De Graafschap west. Doe ik mit Fettje een dag naor Borkum west was, kwammen we heur tegen in et treintien van et stattien naor de haven op ‘e weerommereize. Mooi om ze now nog es weer te zien!