Printer

Vandemorgen he’k op ‘e fiets naor fysiosport in Wolvege west. Tiedens et sporten het et lekker regend, daor was de tuun wel an toe, mar et was vanzels lange niet genoeg. Et is vreselik dreuge. Vandemiddag he’k 50 exemplaoren van et Stellingwarver Nijntje-boekien Pake en beppe Pluus bi’j uutgeveri’je Bornmeer op ‘e Gediek weghaeld. Veur de verkope! Doe ‘k weer thuus was, he’k zes potten heerlike proemesjem maekt. Gisteraovend weren d’r op oonze dorpsmark proemen te koop en daor he’k dus van profiteerd. Et kostte me mar 2 euro en vuuftig centen. As ze ankem weke ok te koop binnen, neem ik weer zoe’n fluttien mit. Of nog wat meer… Ik bin gek op proemesjem en aj’ et zels maeken is et vule lekkerder en gezonder as dat spul uut de winkel.

Ik wol toch zo vreselike graeg da’k wat meer van techniek snapte. De printer zee dat de blauwe inkpetroon leeg was en vervongen wodden mos. Ik wete hoe dat moet en dat is me ok wel lokt. Mar now zegt de printer dat die ni’je ok leeg is. Van zokke dingen woj’ toch raodeloos. Ik kan d’r mit mien beparkte verstaand dus niet bi’j.

D’r kwam een kaorte van Jan, Diana, Raymond en Leon. Die zitten een midweke in vekaansiepark De Eemhof in Zeewoolde. Even d’r een dag of wat tussenuut is goed veur een meens!