Primera Wolvege

Doe ‘k vandemiddag in mien warkkaemer zat, zag ik een mooi statmesien, an de aandere kaant van et raem, in de pollen zitten. Kool- en pimpelmesies bin d’r altied zat, mar et maekt me bliede a’k de statmesies ok om huus henne hebbe.

De sluting van boekwinkel Zwikstra in Wolvege was een hiele klap veur de verkope van Stellingwarver boeken, mar oonze boeken bin now ok bi’j de Primera op et oost van Wolvege te koop. Dat is goed ni’js, liekt me zo toe. De Primera in Noordwoolde verkocht al jaoren Stellingwarver boeken. En ze bin vanzels ok te koop bi’j de Bruna in Oosterwoolde en de Schrieversronte in Berkoop. Mit oonze boeken brengen we oonze mooie tael de wereld in. Dat kan trouwens wel vule meer daon wodden. En et kan zo simpel. Gewoon wat in et Stellingwarfs op een ansichtkaorte zetten. Bi’j kefé-resteraant Boszicht in Ni’jberkoop hebben ze dat goed begrepen! Daor bin onderstaonde kaorten te kriegen. Is dit gien goed idee veur Appelsche, Berkoop, Oosterwoolde, Noordwoolde en Wolvege?