Prikkedille

Vandemorgen he’k boeken bi’j de Stellingwarver Schrieversronte weghaeld veur de kastmark in et karkien van Blesdieke op vri’jdagmiddag 12 december. Dat is mitien de laeste keer dat ik mit boeken op een mark stao. Kom mar even langes in Blesdieke! Aanderen moe’n et aanst mar van me overnemen. Vandemiddag he’k naor fysiosport in Wolvege west. Dat kon vleden weke vri’jdag niet deurgaon vanwege de tuunmannen. Ik zal vandeweke zodoende twie keer naor fysiosport.

Een schoffien leden he’k et achtste en laeste diel lezen van de Bergmankronieken. De serie boeken over Sebastian Bergman, de seksverslaafde pelisiepsycholoog. Een schitterende serie boeken van Hjorth Rosenfeldt (Michael Hjorth en Hans Rosenfeldt). Ik kreeg doe drekt et idee en lees de acht boeken nog een keer aachter mekeer an. Dat is omtrent vierduzend bladzieden, mar dat is mar een prikkedille. Et is al zes jaor leden da’k et eerste diel lezen hebbe. De moordzaeken die iedere keer oplost wodden moeten weet ik toch niet sekuur meer. De heufdpersonen ken ik vanzels wel. Et aorige is dat ik meer van heur weet as dat ze zels in et begin weten. Ik wete dat Vanja de dochter van Sebastian is, mar dat weten ze zels nog niet. Ik wete ok dat et mit rechercheur Billie slecht oflopen zal. Dat wet hi’jzels eerst nog niet. Ik hebbe now al twie boeken weer lezen en et is nog altied lieke prachtig. In et eerste boek Wat verborgen is wodt de zestienjaorige Roger vermoord vunnen in moerassig gebied. De koegel die him raekt het is votsneden. Et spoor leidet naor een nogal deftige schoele… In et twiede boek, De discipel, wo’n verschillende vrouwluden van kaant maekt op percies dezelde meniere as Edward Hinde indertied dee. Mar Hinde zit now nog in de gevangenis. Wie het et dan wel daon? Et team rechercheurs en Sebastian Bergman pakken de daoder(s) gelokkig altied! Et bin prachtige, spannende boeken. Ie moe’n almar deurlezen!