Pries en brillen

Gerard Marcel de Jong, mien kollega-kollumnist in de Liwwadder Kraante het de Rink van der Veldepries wunnen veur zien en de eerste Bildtstaelige roman Blau fan dagen, griis van onrust. Ik hebbe Gerard d’r votdaolik mit fielseteerd. Ik kreeg een peer jaor leden as eerste de Rink van der Veldepries veur een boek dat niet in et Fries schreven was. Dat was de roman Vroeger is veurgoed veurbi’j. Ik vien et hatstikke mooi dat die mooie pries now een Stellingwarver en een Bildtse winner het.

Vandemiddag het Fettje mit me mit west naor de optometrist in et ziekenhuus. Veur de beide staaropperaosies kon ik mit mien linker en goeie oge nog 70% zien en mit mien rechter en slechte (luie) oge nog mar 20%. Et zicht d’r nao de beide opperaosies hiel goed uut. In december zee de dokter dat ik van 70 naor 90 en van 20 naor 50 gaon kon. Meer zol veur et luie oge nooit kunnen. En dat is allemaole percies zo uutkommen. Ik hebbe een recept mitkregen veur een ni’je brille (en zunnebrille). Naodat Fettje me thuusbrocht het en we hier wat dronken hebben, bin ‘k drekt naor mien vaaste brilleman Folkert de Jong in Wolvege gaon. Die het de boel ok weer naokeken en kwam op etzelde uut as de man in et ziekenhuus. Stel je toch es veur dat et in twie uren tied hiel wat aanders opleverd hadde… Ik hebbe ien ni’j montuur uutzocht. Over twie weken moet de boel klaor wezen en dan za’k bliede toe wezen.