Prenten voor/prints for

Ik hadde veur vandemiddag een uutneudiging veur et uutkommen van een boek en de eupening van een tentoonstelling bi’j Nobilis, et Centrum veur prentkeunst op ‘e Fochtel. Ik hebbe gistermiddag liekewel een mailtien stuurd da’k niet kommen zol. Ik was de laeste daegen beheurlik mu en dan moe’k zels zo wies wezen en zeg dingen of. Ik schrappe alderhaande wark, mar ik hebbe ok een protte sociaole kontakten en verplichtings. En dat kan allemaole niet meer. Daor schrap ik ok in. Ik hebbe ok een liesien mit naemen van alderhaande meensken daor a’k aenlik henne moet om een bakkien drinken of omdat ze ziek of jaorig west hebben. Ik schoeve et even op ‘e wat langere baene. Ik kan et allemaole niet. Et komt wel es een keer. Ik wil drekt niet weer in et ziekenhuus belanen. Morgenmiddag za’k wel weer even argens naor toe.

Ik hebbe vanzels wel wat mist op ‘e Fochtel. Daor verscheen vandaege et boek Prenten voor/prints for Christos Giannakos van Peter Lazarov. Peter is overkommen uut Bulgeri’je en Christos uut Griekenlaand. Ik hebbe op et boek intekend, et ligt wel veur me klaor. Netuurlik hadde ik Peter graeg weer es even zien wild. Veertien jaor laank het hi’j warkt an series prenten in opdracht van de Oold-Griekse dichter Christos Giannakos. De Griekse mythologie was heur inspiraosiebron. Alle gravures wo’n tentoonsteld bi’j Nobilis van vandaege t/m 23 november. Et boek is twietaelig uutgeven: Nederlaans en Engels. De vertaeling is van Liesbeth Zuidgeest-Perquin. De vormgeving van et boek is van Sijtze Veldema. Et is ongetwiefeld een prachtboek!