Preenses Beatrix in Noordwoolde

Ik was vandemiddag om goed twaelf ure al in et Buurthuus van Noordwoolde en kwam daor op ‘e vierde riegel te zitten naost Jan de Vries, vroeger van de ofdieling onderwies van de gemiente West-Stellingwarf. Martin van Nieuwenhoven praotte de boel eerst wat an mekaander. Wawwe wel en niet doen mossen en zo… Mooi was dawwe op een groot scharm zien konnen wat d’r butendeure gebeurde. Een grote mennigte volk ston op ‘e komst van Preenses Beatrix te waachten. Ze is krek as dattig jaor leden deur Ni’jhooltpae reden, van Wolvege naor Noordwoolde. Ze kwam d’r om ien ure henne an rieden. Drie auto’s en een pelisiemoterrieder veurop. Preenses Beatrix hadde een hofdame en een adjudaant bi’j heur en wodde verwelkomt deur Arno Brok, de kommesaores van de Keuning, Stieneke van der Graaf, de burgemeester van West-Stellingwarf en Iwan van Nieuwenhoven, de direkteur van et Nationaol Vlechtmuseum onder luud applaus van et pebliek. Een schoffien laeter kwam ze de grote zael in. Van oons kreeg ze een staond applaus. D’r wodden toespraoken hullen deur Iwan van Nieuwenhoven en Bert Looper van de Raod van Bestuur. Daornao gong de preenses de tentoonstelling bekieken mit een groep volk. Wi’j bleven in de grote zael zitten en konnen op et scharm alles weer volgen. Beatrix onthulde de wiege die hier veur heur maekt wodde en die indertied anbeuden wodde op Peleis Soestdiek. We konnen heuren dat ze zee dat ze heur niet meer herinneren kon dat ze d’r inlegen hadde. De wiege is mit nog een aandere wiege mit de waetersnoodramp votgeven zodat hi’j bruukt wodden kon deur meensken die van alles kwietraekt weren. Zo kwam de wiege bi’j een femilie in Zeelaand terechte. De man die d’r daor doe inlegen het was d’r vandemiddag ok mit zien femilie. En now is de wiege veurgoed weeromme in Noordwoolde. Preenses Beatrix nam rejaol de tied om alles te bekieken. Naodat zi’j weer op huus an gaon was, konnen wi’j alles bekieken. Ik hebbe mit Harry alles bi’jlanges scharreld en we hebben mit tal van meensken praot. Et was een mooie middag en ik bin bliede da’k d’r bi’j wezen moch!