Prachtige zoemerdag

Was et vandaege de laeste prachtige zoemerdag? Ankem weke zakken we weeromme naor 13 graoden. Gruwelik! Mar begin oktober kan et ok prachtig weer wezen. Vroeger hawwe de sutelaktie om die tied henne. Ik wete nog best da’k mit mien moeder sutelde tussen Munnekeburen en Scharpenzeel. We leupen zonder jasse en mit et zwiet op ‘e rogge. Halverwege oktober was altied de Boekemark in Drachten nao de Friese sutelaktie. Et kon dan roetkoold wezen, mar best ok vaeke was et dan mooi, zunnig weer. Fettje was d’r bi’j, die wet dit ok. D’r is dus nog hope veur een peer mooie fietstochten. Mit de boot vot kan niet meer, die is gister uut et waeter haeld. Vandaege he’k d’r nog ommeraek van profiteerd en een fietstocht van 46 kilemeter maekt. Bi’j de Kuunder langes naor de sluus onder Ni’jberkoop en doe over Berkoop, Buil en De Oosterstreek naor Noordwoolde. Daor he’k op et terras van Bliede een bakkien drinken en een twaelfuurtien had. Doe bin ‘k naor Noordwoolde-Zuud fietst en vervolgens de Westvierdepatten uut, onder Vinkege langes. Over Steggerde en De Hoeve bin ‘k weer op huus an gaon. Wat een prachtig weer! Ik kwam Annie Dedden mit een kammeraodske onderwegens twie keer tegen! Hieronder een foto van de oolde ekkelboom op ‘e Bekhofschaans. Hier bin ‘k bi’jlanges fietst. Hier ston in et Rampjaor een Stellingwarver soldaot op waacht en die wodde inienend bescheuten deur et raprut van de bisschop van Münster. Ze scheuten him de piepe tot de mond uut. Mar oonze Stellingwarver wodde d’r niet aanders van. ‘Dat was bi’j de bek of,’ zee hi’j, as was d’r niks gebeurd. En doe scheut hi’j doodgemoedereerd een stokmennig tegenstaanders dood. Dat weren nog es kerels. De Stellingwarvers van vandaege-de-dag lokt et niet iens en hool heur eigen tael in de bienen. Zo kan een volk deur de jaoren henne oftaekelen