Johan Veenstra
Stellingwarver schriever en verteller

Prachtige museumdag

Plaetst op 28 jannewaori 2025.

We hebben d’r vandaege een museumdag van maekt. We bin naor et mooie Hanzestattien Hadderwiek west en daor hewwe eerst et Marius van Dokkummuseum bekeken. Ik was d’r wel es eerder west, mar et is iederkeer weer slim de muuite weerd. Prachtige schilderi’jen mit een protte humor daor aj’ omme lachen kunnen. Van Dokkum begon eerst te schilderen mit Jopie Huusman as veurbeeld. Mar hi’j het now hielemaole een eigen stijl, die uniek is in Nederlaand. We hebben ok een film over zien wark zien en de eupening van et museum in 2018 deur André van Duin. D’r kommen zovule meensken dat et museum vusen te krap wodden is. Dat ze verhuzen binnenkot naor een aander en groter mar ok mooi historisch gebouw in de stad. Vervolgens biwwe naor et Stadsmuseum west. Daor hewwe een tentoonstelling over de Waetersnoodramp van 1825 bekeken, want Hadderwiek ston doe ok onder waeter. We hebben ok de tentoonstelling Tijdloos meesterschap bekeken mit schilderi’jen van de bekende schilder Sierk Schröder. De  bekende petretten die hi’j schilderd het van Juliana en Beatrix hangen d’r ok. In et Stadsmuseum hewwe een bakkien drinken had mit een hiempe zeebeer (een soort koeke). Hiel lekker. We hebben vanaovend waarm eten  had in resteraant De Fûke in Echten. Dat was ok hiel arg lekker. Ik hebbe zalm had. En now is die mooie dag al weer veurbi’j. Et was gien mooi fotoweer, mar hieronder toch twie foto’s. Boven: et centrum van Hadderwiek. Onder: et Stadsmuseum.