Prachtige aovend in Berkoop

Et was gister een prachtige aovend in Berkoop. De kulturele aovend tiedens Eupen Stal. D’r weren omtrent veertig meensken en ik daenke dat die allemaole geneuten hebben. Peter Hiemstra, de veurzitter van Eupen Stal, eupende en sleut de aovend. Ik bin gelokkig niet in mien verhaelen stoeken bleven. Et gong goed. Douwe is vanzels een geweldig goeie verteller. Et was mooi dawwe tegere et verhael De drie kwakzalvers van Louis Paul Boon vertellen konnen. Ik begon in et Stellingwarfs, hi’j nam et halverwege in et Fries over. Sanne Bakker (harpe) was een eupenbaoring veur me. Wat prachtig! Ie kommen vanzels ok niet zomar bi’j et Metropole Orkest. Dat is een orkest van wereldklasse. Soms was et liefelik en dan weer opzwiepend. Ze kreeg een geweldig applaus. Ze speulde trouwens op blote voeten. Ik mos an Sandy Shaw daenken, die wun in 1967 et Eurovisie Songfestival op blote voeten mit et lietien Puppet on a string. Et was hiel toepasselik dat Douwe et Chinese sprokien De onbespeelbare harp vertelde. Gedurende zien verhael koj’ zo now en dan de harpe van Sanne heuren. Hiel arg mooi, vun ik dat. Ik vun et ok mooi dat Be en Henny uut Stienwiek d’r weren en Jan en Anneke uut Spanje. Die zitten now tiedelik in Haovelte en kommen van oorsprong van de Westhoeke. Hieronder twie foto’s die deur Be maekt binnen en die hi’j me gisteraovend al toestuurde.